રીલ લાઇફ અને રિયલ લાઇફ
સરખામણી કેટલી યોગ્ય?
એકમેકનાં મન સુધી : જ્યોતિ ઉનડકટ
ગ્લેમર વર્લ્ડ અને કચકડાંની દુનિયા આજના યુગમાં જીવતાં લોકોનો એક અભિન્ન હિસ્સો બની ગઈ છે. રહેણી-કરણીથી માંડીને લોકોને જોવાના-માપવાના નજરિયામાં પણ આ કચકડાંની દુનિયાનાં પાત્રો હાવી રહે છે. બીજી એક વાત એ પણ સાચી છે કે,જો આ સિરિયલ્સ અને ફિલ્મોની ચેનલ્સ ન હોત તો કેટલી બધી અલગ અલગ ઉંમરની વ્યક્તિઓ માટે સમય પસાર કરવો પણ અઘરો બની જાત. સમય પસાર કરવાની વાત અને એ સ્ક્રીપ્ટેડ જિંદગી જીવતાં પાત્રોનું આપણી માથે હાવી થઈ જવું એ બંને બહુ જ જુદી વાત છે. મનોરંજન માટે જોવામાં આવે ત્યાં સુધી કંઈ વાંધો ન હોઈ શકે, પણ એ પ્રમાણે જીવન જીવવાની કે એ રીતભાતમાં પોતાની રહેણી-કરણીને ખોટી રીતે ઢાળવાની કોશિશ કરવામાં આવે ત્યારે અડચણો ઊભી થાય છે.
એક વાચક નામે શ્રીલેખાની વાત કરીએ. શ્રીલેખા લાડકોડથી ઉછરેલી ઉચ્ચ મધ્યમવર્ગની દીકરી છે. દેખાવમાં બહુ જ બ્યુટીફૂલની ગણનામાં આવે એવી શ્રીલેખાને પોતાની ઓફિસના કામ અંગે બહુ જ બહાર ફરવા જવાનું થતું. એક જ જગ્યાએ અનેક વાર જવાનું થતું. એમાં એને કંપનીના જ એક ક્લાયન્ટ સાથે વધુ બનવા લાગ્યું. ધીમે ધીમે ખબર પડી કે એ દોસ્તીથી વધુ કંઈક છે. બંને પ્રેમમાં પડી ગયાં. બંને એક જ જ્ઞાાતિનાં હોવા છતાં બંનેનાં માતા-પિતા બહુ જલદીથી રાજી ન થયાં. શ્રીલેખા તથા તેના પ્રેમી ધૈર્યએ નક્કી કર્યું હતું કે, બંનેનાં મા-બાપ દિલથી ન માને ત્યાં સુધી કોઈ ઉતાવળ ન કરવી. એક દોઢ વર્ષ જેવું થયું અને બંને તરફથી હા આવી ગઈ.
શ્રીલેખા પોતાનાં સાસરિયાંની વાત કહે છે. એ કહે છે, ટેલિવિઝન ઉપર આવતી અલગ અલગ સિરિયલ્સ એ જુએ છે. પિયરમાં એની મમ્મી પણ ક્રેઝી છે અને સાસરે એનાં સાસુને પણ આવી સિરિયલ્સ જોવી બહુ ગમે છે. એ કહે છે, "મારી મમ્મી હોય કે સાસુ બંને સિરિયલ્સ જુએ ત્યાં સુધી વાંધો નથી પણ એ અભિનય કરતાં પાત્રોની સરખામણી બંને જાણેઅજાણે ખરી જિંદગીનાં પાત્રો સાથે કરવા માંડે છે. મારી મમ્મીના માથે એ સિરિયલમાં થતાં સાજ-શણગાર અને ફેશનની વાત હાવી હોય છે. મારી સગાઈ થઈ ત્યારે પણ મને એવો ફોર્સ કરે કે, મારે ફલાણી સિરિયલમાં ઢીંકણું પાત્ર પહેરે છે એવી ફેશનની સાડી-અનારકલી લેવાં જોઈએ. એરિંગ્સ હોય કે બીજી જ્વેલરી મને એવું જ કહે કે, તને ગમે એવું નહીં પણ જેવો ટ્રેન્ડ હોય એવું તારે લેવું જોઈએ."
તો આ બાજુ મારાં સાસુની તો વાત શું કરું? એ કહે છે, "સિરિયલમાં આવતાં પાત્રોનો અભિનય જોઈને એ તો એમાં ખોવાઈ જ જાય છે. એક-બે વાર હું સાસરે કોઈ તહેવારોમાં ગયેલી. તો મારાં સાસુ એકાદ સિરિયલમાં આવતી વહુના પાત્રને જોઈને એવું બોલ્યાં કે આવી વહુ તો કોઈ ભાગ્યશાળીને જ મળે. બધાંને થોડી આવી વહુ મળવાની છે?"
શ્રીલેખા કહે છે, "હું એમની પસંદગીની વહુ નથી. એમના દીકરાની પસંદગીનું પાત્ર છું. એટલે એ એક હદથી વધારે મારી ઉપર સાસુપણું નથી કરી શકતાં. આ વાતનો એમને રંજ હોય એવું મને સતત લાગ્યા રાખે છે. જો પોતાની પસંદગીની વહુ આવી હોય તો પોતાના કંટ્રોલમાં રહે એવું એમનું માનવું છે. વળી, એ પાત્રો જોઈને ખરી જિંદગીમાં હોય એ લોકો સાથે સરખામણી કરી બેસે ત્યારે મને વાત ગળે નથી ઊતરતી. એ જ્યારે જ્યારે એવું બોલે કે, આવી વહુ તો કોઈક લકી વ્યક્તિને જ મળે ત્યારે ત્યારે મને એવું કહેવાનું મન થાય છે કે, તમે પણ ક્યાં એ કચકડે મઢેલી સાસુ જેવાં છો?"
પોતાની પસંદગીની વહુ હોય તો એની ઉપર આધિપત્ય જમાવી શકાય. દીકરાની પસંદગીની છોકરી સિરિયલમાં આવતી વહુ જેવી ન હોય. આ અને આવી માનસિકતા ધરાવતાં સાસુ સાથે મારે એડજસ્ટ થવાનું છે. કોઈક વખત એવું લાગે છે કે, ખરેખર સિરિયલમાં આવે છે એટલું સરળ છે તો કોઈક વખત એમ લાગે છે કે, સંબંધોની આંટીઘૂંટીમાં આ ગ્લેમર વર્લ્ડ આગમાં ઘી હોમવાનું કામ કરે છે. સાચી વાત એ છે કે, રીલ લાઇફની સિરિયલનાં પાત્રોને રિયલ લાઇફની સાથે ન જોડીએ એ જ વાજબી છે.
(તા. 29 ઓકટોબર, 2014. બુધવાર. 'સંદેશ', અર્ધસાપ્તાહિક પૂર્તિ)
email : jyotiu@gmail.com
email : jyotiu@gmail.com
